O día 11 de febreiro é o Día da Muller e da Nena na Ciencia.
Hoxe propoñemos unha serie de lecturas – e reflexións!- sobre a situación das mulleres no eido científico. Aínda estamos lonxe de acadar a paridade, tanto nas equipas de investigación como na nosa presenza nos órganos de xestión.
Deixamos algunhas ligazóns que vimos recompilando estes días:
- En primeiro lugar, a infografía que elaborou a axencia EFE sobre a situación das mulleres científicas en España e o seu acceso a postos de coñecemento. A info, un traballo de Borja García, esta aloxado na web da propia axencia no apartado infografías. Convén botar unha ollada aos datos: 21% dos cargos de dirección e cátedras nas universidades públicas están ocupados por mulleres- soamente- e únicamente temos tres rectoras neste 2017.
- O informe “Científicas en cifras”2015: estadísticas e indicadores de la (des)igualdad de género en la profesión científica, del Ministerio de Economía y Competitividad. Aí andan moitos datos: desde a evolución da presenza de mulleres nos organismos públicos de investigación, universidades, etc.
- No CSIC., a unidade Mujeres y Ciencia nace ao abeiro da Ley Orgánica 3/2007, de 22 de marzo, para la Igualdad Efectiva de Mujeres y Hombres,con dous obxectivos especialmente relevantes: estudar as causas que fan difícil o ingreso e o posterior desenvolvemento de carreira das mulleres e propor accións destinadas a conseguir a igualdade entre homes e mulleres no CSIC. Posúe abundante documentación.
- Na Universidad del País Vasco manténse a cátedra Mujeres con Ciencia. Trátase de divulgar e facer visible a tarefa das científicas e de como a visibilidade non vai en paralelo coa súa valía, co seu traballo.
- Na Universidade de Santiago de Compostela, a oficina de Igualdade de Xénero, mantén unha programación para este día: Unha exposición na Biblioteca Concepción Arenal, baixo o título Mulleres no Laboratorio: as primeiras científicas da USC e a participaciónen obradoiros dirixidos a nenas e nenos de 8 a 12 anos, nas acitividades que se desenvolverán no MUNCYT da Coruña.
A tese de doutoramento de Xoana Pintos, dispoñible no noso repositorio Minerva: As mulleres nos estudos experimentais da Universidade de Santiago, 1910-1960 é un traballo imprescindible para coñecer tanto as primeiras mulleres científicas na nosa Universidade como o traballo que desenvolveron
Conversa
Aínda non hai comentarios.