BIBLIOTECARIOS E BIBLIOTECARIAS DA BIBLIOTECA INTERCENTROS DE LUGO
O sábado, 8 de novembro tivo lugar na Biblioteca Intercentros o primeiro editatón do Día da Ciencia en Galego. A proposta, que nos chegou do Servizo de Normalización Lingüística, decontado nos encheu de entusiasmo. Aceptámola, combinándoa cos xa daquela varios cursos de formación abertos, os centos de rexistros de usuarias e usuarios novos para crear e modificar, as actualizacións das listas de distribución, o expurgo na sala de Ciencias sociais e todo o traballo engadido que supón o inicio do curso para unha biblioteca que suma xa catro vacantes no seu cadro de persoal.
Con menos dun mes para o evento, repartimos as tarefas de xeito equitativo e horizontal: desde a escolma de fontes de información (libros, artigos, sitios web e outras en recompilacións bibliográficas) que subimos a Wikimedia Commons, ata adecuación de espazos (revisión de equipamento, xestión de acceso á Internet para persoas alleas á USC) pasando pola difusión á comunidade universitaria e educativa en xeral, deseño de cartel, comunicación á prensa, etc.
O día 8 comezou coa presentación de Manuel Díaz Regueiro (Igaciencia), – recollida neste vídeo– sobre o significado do Día da Ciencia en Galego e que podemos resumir coas expresións: máis ciencia, máis galego, máis recoñecemento aos científicos e científicas galegas, máis difusión e máis participación. Incidiu especialmente na importancia de educar ás novas xeracións en habilidades e práctica científica.
Seguiu Elisardo Juncal (Galipedia), que tras unha breve explicación dos piares do proxecto Wikipedia e de como se está a desenvolver concretamentea Galipedia, inicionos no uso da ferramenta de Editor visual. Logo de rexistradas, tanto as persoas que estábamos na biblioteca como as que participaban virtualmente, puxémonos a editar a entrada elixida por cadaquén.
Traballamos, vaia se traballamos!! Creáronse as entradas: Editatón, Día da Ciencia en Galego, Proxéctate en galego, Proxeria, Jesús Andreu Lázaro, Tomás Batuecas Marugán e María Pilar de Torres Luna. Ademais introducíronse modificacións en 15 entradas xa existentes.
Despois dun xantar pracenteiro (vamos, dos de Lugo!) continuamos a edición, pero antes botamos unas risas co relatorio de Carlos Rodríguez Rellán -recollido no vídeo que enlazamos- e que levaba por título: A arqueoloxía experimental e a apocalipse zombi: pequeno manual de supervivencia para nerds na que, por estrano que pareza, conxugaba as ideas de ciencia, compartido, galego, zombi e arqueoloxía de xeito fantástico.
Un resumo do acontecido nese día, pode verse neste vídeo realizado tamén polo persoal da biblioteca.
A xornada rematou, pero non a nosa satisfacción, nin a certeza de que isto non fixo máis que empezar.
Se a misión da biblioteca é a participación na construción do coñecemento, a sensación coa que ficamos foi a de vir de facelo no sentido máis literal. Botar a andar a “biblioteca galipediana”, utilizando todo o seu potencial para común aproveitamento foi a maior satisfacción.
Fenomenal traballo por parte da Biblioteca Intercentros de Lugo e estupendo día de creación, aprendizaxe e diversión con boa xente. Ata o ano que ven!
GústameGústame